书店记忆

  白话广州

  周末得闲翻下书柜,睇到本旧书,喺最后一页引住个“广州购书中心”嘅蓝色印章,顿时勾起咗旧阵时买书嘅记忆。

  购书中心嘅印章,除咗书店名之外,仲有几个字“购书纪念章”。旧阵时,我哋去书店买书,呢种印章系必不可少嘅,一来表示你俾咗钱,二来亦做个纪念。未来某一日,好似我咁,翻开某本书嘅封底,睇到呢个内涵丰富嘅印章,记起过往时光嘅点滴,亦系一件乐事。

  除咗购书中心,我觉得广州咁多家书店,个印章最靓嘅,系北京路嘅古籍书店。呢个章上边系一个天方地圆嘅“铜钱”,圆边内侧排列住篆体“古籍书店”几个字,中间就用现代嘅黑体,刻住“广州”二字,通今博古嘅味道跃然喺印章之上。系“铜钱”嘅下面,系一本平铺嘅线装书模型。我谂,呢个印章可能意味住,呢间店唔单只卖古籍,仲涉及收藏品。不过,延伸开来嘅,或者亦可以解读为“书中自有黄金屋”,都几有韵味。

  加阵,电商发达,好多人买书都会拣当当、京东之类。不过,我谂,书店嘅魅力,并唔完全在于“生意”,如果好似旧阵时嘅印章咁,多俾啲有文化味道嘅“增值服务”俾顾客,一定唔会输俾网络。

  ◎闻歌 媒体人