番禺水色

  白话广州

  新闻话,国庆期间,番禺宝墨园一连七日举办咗“三色”巡游表演,分别系“紫坭春色”“沙湾飘色”同埋“番禺水色”。呢“三色”各有特色,好似“番禺水色”噉,佢嘅特色就系喺水上边表演啦。睇住啲色仔色女喺水度飘飘似仙,好有“八仙过海各显神通”嘅即视感,现场仲会周不时喷下烟,搞到好逼真。

  好多人都会好奇,呢种“水色”系点样浮喺水面嘅呢?据行家介绍,“番禺水色”系用杉木扎成嘅木排作为浮架,而杉排系沉喺水下边嘅,佢四周绑住类似石板咁嘅重物,坠住就唔会浮起身,咁成个表演净系睇到啲色仔色女,好似真系喺水入边出嚟噉。

  以前嘅“番禺水色”,表演大多系传统嘅民间传说同戏曲故事,比如《哪吒闹海》《水漫金山》《八仙过海》,内容都系同水有关。此外,佢啲艺术构思都好奇、巧,好似《渭水钓鱼》,就用带磁铁嘅鱼钩去吊起钉住铁钉嘅小木鱼,远远咁睇,好似识法术噉。

  “番禺水色”大概系清朝雍正年间出现,有差唔多成三百年嘅历史。最初嘅水色表演系为咗祭祀天后,后嚟仲加入咗竞技内容:以坊或姓为单位,各自秘密制色,到时再攞出嚟斗一番。◎阮栩 编辑